Rebolusyon laeng ti mangbaliw iti bulok a gimong

Lalo pay nga al-allilawen ti Rehimen US-Duterte ti umili a babaen ti nan-anayas a pamuspusan, kas ti eleksyon ket magun-od ti panagbalbaliw iti gimong. Ngem nabayagen a nakariing ti umili a Pilipino, a ti eleksyon iti sidong ti malakolonyal ken malapyudal a gimong ket panagsisinnukat laeng dagiti personahe iti burukrasya nga imatmatonan dagiti mananggundaway ken babaknang a dasig ti appo’t daga ken dadakkel a burgesya kumprador a kontrolado dagiti imperyalista, kangrunaan ti US.

Kadagiti napalabas nga eleksyon kas ti eleksyon 2016 a nangipatugaw ken ni Duterte, awan ti intunda ti eleksyon a basaran a panagbalbaliw iti gimong. Saan a narisut nu di ket pakpakaruen ti rehimen US-Duterte ti krisis iti malakolonyal ken malapyudal a gimong. Babaen ti TRAIN Law, inpataw na ti nadagsen a buwis kadagiti umili a mangituntunda ti napaspas a panagngato ti presyo ti gagatangen ken serbisyo. Ti patakaran iti nalabes nga importasyon kadagiti basaran a produkto a pangkonsumo kas ti bagas, babaen ti Rice Tariffication and Liberalization Law ket lalo a mangitentennag iti pagbiagan dagiti mannalon ken ti ekonomiya ti pagilian. Dagitoy a patakaran ket mangidurduron iti sobra-sobra a panagutang ti rehimen tapno masullatan ti dumakdakkel a depisito . Gapu ditoy, dikdiktaran dagiti imperyalista ti ekonomiya tayo kas ti panangiturong ti produksyon iti agrikultura ti pagilian iti internasyunal a linnakuan ken iti awan limitasyon na a pananggamrud da kadagiti natural a kinabaknang iti ansestral a daga babaen kadagiti proyekto a minasan ken enerhiya. Kasukat ti pautang a pondo ti China kadagiti nadumaduma a proyekto kas iti Upper Chico River Irrigation System ket ti nawaya a pananggamrud ti China iti patrimonya ti Pilipinas iti West Philippine Sea ken ti pannakaikompromiso ti soberanya ti Pilipinas.

Agtultuloy met dagiti dati a patakaran a kontra-mangmangged kas ti kontraktwalisasyon ken regionalization imbes a nasyunalisasyon ti minimum wage. Kagiddan na, kumarkaro ti militarisasyon tapno lapdan ti panaglaban ti umili kadagiti maiyat-atnag a kontra-umili a patakaran. Babaen ti panangitultuloy iti Oplan Kapayapaan, ti awan limitasyon na nga extension ti Martial Law idiay Mindanao, panangpasardeng iti peace talks ken panangideklara iti all-out war iti rebolusyonaryo a tignayan ken ti gera kontra droga, kumarkaro ti panaglabsing iti karbengan-tao.

Eleksyon tapno kontrolen ti turay ken aglayon ti imperyalista nga interes

Dagitoy a kontra-umili ken maka-imperyalista a patakaran ti rehimen Duterte ket ituloy laeng dagiti sumukat wenno agtuloy nga agakem iti Senado, Kongreso ken lokal a gobyerno. Uray ti partylist system a para koma kadagiti marigrigat ket ag-agawen latta dagiti babaknang tapno isigurado nga amin a puesto iti pagpandayan-linteg ket madominaran da ken ad-adu ti makurakot da a pondo.

Ikagkagumaan ni Duterte a makontrol ti eleksyon tatta 2019 tapno maiduron ti panangbaliw ti Konstitusyon ti 1987 . Babaen ti charter change, ti kinabaknang ken ekonomiya ti Pilipinas ket naan-anay a makontrol dagiti gangannaet a dadakkel a kapitalista, karaman dagiti iserrek da a negosyo a mangusar kadagiti natural a rekursos dagiti ansestral a daga ti nailian a minorya. Babaen met laeng ti charter change, maiduron ti bogus a pederalismo nu sadinno a mabukodan ti pasista a diktador ti turay ken madutokan ken makontrol na dagiti aso-aso na kadagiti lokal a dinastiya ken warlord.

Ar-aramiden ti rehimen ti amin a pamuspusan tapno mapadisi ken saan a tumugaw dagiti amin a kontra kenkuana. Binukel na ti National Task Force (NTF) to End Insurgency tapno “gibusan” ti komunista nga armado a dangadang. Babaen ti NTF, imatmatonan ni Duterte ti reaksyunaryo a gobyerno babaen kadagiti aso-aso na a militar tapno maipuersa dagiti kontra-umili a patakaran na. Isu nga itatta nga eleksyon ket adu dagiti tumaray a retirado a militar, pulis ken reservist. Kayat nga isigurado ti NTF a dagiti progresibo ken maka-umili a kandidato ken partylist ket saan a makapuesto itatta nga eleksyon, isu nga aramiden da amin a pamuspusan tapno dadaelen dagitoy. Irasrason met ti AFP a dagiti kano NPA ket agkikkikil kadagiti pulitiko isu a paingeten da dagiti operasyon ken presensya da kadagiti komunidad, ngem ti pudno a panggep dagitoy ket butbutngen dagiti umili babaen ti red-tagging ken panangpadakes kadagiti progresibo ken maka-umili a partylist ken kandidato.

Ditoy Cordillera, ti agdama a pulitika ket dominado latta dagiti datin a trapo ken warlord. Kaaduan kadakuada ket agin-interes a maagaw dagiti pampulitika a bentahe ken pabor nga ididiaya ti charter change, pederalismo ken bogus a rehiyunal nga otonomiya. Isu a kadagiti lugar a dominante dagiti warlord, kas iti Abra, nadara latta ti balubal iti pulitika, kasta met a narimbaw latta ti ginnatangan ti botos iti amin a paset ti rehiyon. Kadagiti tumaray para iti Kongreso ken kadagiti posisyon iti lokal a gobyerno, manmano ti mangaw-awit iti plataporma para iti pudno a panagbalbaliw ti maidadanes a kasasaad dagiti nailian a minorya iti Cordillera ken pananggun-od ti bukod da a pangngeddeng ken demokrasya. Adda met dagiti agngayangay a retirado a pulis, militar, kamkameng ti CPLA ken dagiti napeklan a kakadua dagiti militar tapno ipatungpal da ti programa ti NTF to End Insurgency. Kabayatan iti kampanya iti eleksyon iti Cordillera, itamtambor latta dagiti trapo ti Peace Zone tapno pasardengen ti rebolusyonaryo nga armado a dangadang ken pagtalnaen ti panaglaban ti umili. Idurduron da met ti localized peace talks a saan a mangiramramut nu di ket mangkalkalub laeng kadagiti parikut ti umili iti nailian a pannakaidadanes, kinaawan ken kinakurang ti daga a sukayen ken pannakagamrud ti ansestral a daga, nadumaduma a pyudal ken malapyudal a pannakagundaway dagiti mannalon, nakaro a panagbaybay-a ti estado kadagiti basaran a sosyal a serbisyo para kadagiti nailian a minorya, militarisasyon ken nasaknap a panaglabsing iti karbengan-tao. Ipukpukkaw da ti Regional Autonomy ti Cordillera, ngem itantandudo da met dagiti patakaran ti rehimen a mangigalgalut kadagiti ansestral a teritoryo iti kontrol dagiti imperyalista, a mangpakpakaro ti pannakarabngis ti karbengan ken wayawa ti nailian a minorya iti bukod a pangngeddeng. Dagiti adyenda iti panagbalbaliw nga idatdatag da ket dagiti programa iti panangitandudo iti liberalisasyon ti agrikultura a lalo a mangitentennag ti kabibiag dagiti gardinero-mannalon, panangitandudo iti bogus a patakaran ti DENR iti panangsalwad iti aglawlaw laban kadagiti babassit a ragadero ken minero ken imprastruktura a paggatasan laeng dagiti pulitiko a dadakkel a kontraktor.

Awan ti pudno a panagbalbaliw nga itunda ti reaksyunaryo nga eleksyon

Inpundar ti kolonyalista a US ti burgis nga eleksyon ken pampulitika nga istruktura ti Pilipinas a nakadisenyo iti pampulitika nga istruktura ti imperyalista a US. Inrugi nga imatonan daytoy dagiti aso-aso na nga appo’t daga ken dadakkel a burgesya kumprador kas panangisagana kadakuada iti panangited ti imperyalista a US iti bogus a wayawaya ti Pilipinas. Babaen kadagiti partido pulitikal dagiti babaknang nga agbabalubal kadagiti posisyon iti gobyerno, naisigurado a siasinoman ti mangabak kadakuada ket ti interes da ken ti among da nga imperyalista a US ti maipagna. Manipud inted na ti sinsinan a waya-waya ti Pilipinas agingga ita, ti eleksyon iti Pilipinas ket bibiangan latta ti imperyalista a US. Agsisinnublat laeng dagiti rehimen nga aso-aso na a mangipatpataray iti malakolonyal ken malapyudal a gimong.

Saan a reporma wenno reaksyunaryo nga eleksyon ti mangbaliw ti kasasaad ti umili a Pilipino, karaman ti pannakagun-od ti bukod a pangngeddeng dagiti nailian a minorya. Maaramid laeng ti naan-anay a panagbalbaliw iti gimong babaen ti demokratiko a rebolusyon ti umili a Pilipino a mangrippuog iti turay dagiti dadakkel a burgesya kumprador ken appo’t daga a salsalakniban dagiti imperyalista. Babaen ti armado a dangadang , maibangon ti turay dagiti mannalon, mangmangged ken dagiti dadduma pay a maidaddadanes a dasig iti gimong. Addang-addang a magibusan ti pyudal ken mala-pyudal a panaggundaway kadagiti naruay a mannalon.

Nupay kasta, ti burgis nga eleksyon ket mabalin a gundawayan tapno makagun-od kadagiti pampulitika a ganansya ken pang-ekonomiya a pagimbagan ti umili nga agserbi iti panangiyabante ti nailian demokratiko a rebolusyon. Maipasaknap ti programa ti rebolusyon ken maibutaktak ti maka-imperyalista, maka-babaknang ken pasista a posisyon iti uneg ti reaksyunaryo a gobyerno. Mairupir ti tignayan a masa dagiti demokratiko a kalikagum da. Maipatugaw dagiti pudno a maka-umili ken progresibo a kandidato ken partylist iti Kongreso, Senado ken kadagiti posisyon iti lokal a gobyerno tapnu adda ti kadua a mangilaban ti interes dagiti umili. Maisina ken maparmek dagiti napeklan a kontra-umili, kontra-rebolusyonaryo ken pasista a politiko. Mapalawa ken
makonsolida dagiti base a masa ken alyado ti rebolusyon.

Ita nga eleksyon, lalo pay a kasapulan nga ilawag a ti pulitikal a partido a pudno a mangitantandudo ti interes ti umili ket ti Partido Komunista ti Pilipinas (PKP). Aw-awiten ti PKP ti nailian demokratiko a programa para iti: soberanya kontra iti imperyalismo ken ti panangitakder ti demokratiko a gobyerno ti mangmangged, mannalon ken aking-tengga a dasig; bukod a pangngeddeng dagiti nailian a minorya ken Moro; reporma iti daga ken nailian nga industrialisasyon; libre ken sapasap a serbisyo pangkagimongan; nailian, maka-masa ken syentipiko a kultura.

Iti panawen ti nadara ken makaallilaw a balubal dagiti warlord, trapo ken babaknang, ken bayat nga ing-ingetan pay ti pasista nga armado a puersa ti panangikuspil iti umili ita nga eleksyon, lalo pay a kasapulan a pairtengen ti NPA dagiti addang pannusa kadagiti pasista a tropa ken protektor dagiti gamrud a kumpanya. Tapno mapapigsa ti armado a dangadang, kasapulan a tumipon ti adu a bilang ti kabataan ken umili iti NPA ken
papigsaen ken palawaen ti suporta ditoy. Kasapulan met nga ibangon ti umili dagiti bukod da a depensa kadagiti komunidad laban iti community support & development military operations ken synchronized police operations. Labanan ti militarisasyon kadagiti komunidad ken pananglabsing iti karbengan tao.

Paregtaen ti tignayan ti mannalon tapnu irupir dagiti karbengan ken kalintegan da. Saan laeng nga aguray kadagiti repormista a programa ken proyekto nga ikarkari dagiti pulitiko, wenno agpakaanay iti bassit a siping a bayad ti botos. Ilaban ti libre a serbisyo ken pannakasimpa ti padanum , madagdagus a relip ken rehabilitasyon dagiti perdi ti kalamidad, panangpadur-as ken suporta para ti produksyon, panangpasayaat iti kasasaad ken dadduma pay a pangkabiagan, ken libre a pannakaitulod kadagiti basaran a serbisyo sosyal. Labanan ti importasyon a mangperperdi iti lokal a produksyon, ti usura ken mananggundaway a trading system iti natnateng, mais ken dadduma pay nga agrikultural a produkto ti mannalon iti Cordillera. Kasapulan a talmegan ti dangadang dagiti nailian a minorya ti pananglaban iti nasaknap a panag-agaw dagiti dadakkel a kumpanya ti minas ken enerhiya kadagiti ansestral a daga ken natural a kinabaknang dagitoy. Labanan dagiti ubbaw ken manangallilaw a programa ti reaksyunaryo a gobyerno iti reforestation ken panangsalaknib ti aglawlaw a mangipapaidam kadagiti nailian a minorya iti karbengan da.

Dagiti maisayangkat a taktikal nga opensiba ti NPA ken ti tignay masa para iti pagimbagan da iti panawen ti burgis nga eleksyon ket agserbi para iti panagpalawa ken panagkonsolida iti base a masa, ken pamnagpapigsa iti suporta iti armado a dangadang. Agturong dagitoy iti panagabante ti demokratiko a rebolusyon ti umili a naan-anay a mangwayawaya iti pagilian manipud iti imperyalista ken pyudal a panaggundaway ken panangidadanes, aginga a matun-oyan ti sosyalista a masakbayan.