NPA ginpahimatngunan an mag-asawa nga Jojo ngan Nancy Grey nga atubangon an mga kaso ha ira ha husgado han katawhan

Ginpahimatngunan yana han Arnulfo-Ortiz Command-NPA Western Samar an mag-asawa nga Jojo ngan Nancy Grey nga atubangon an ira mga kaso ha rebolusyunaryo nga husgado han katawhan agud klaruhon an ira mga kontrapunto ngan igsalawad an mga ebidensya nga nag-aabswelto ha ira. Segun ha AOC-NPA, ura-ura na kabug-at ngan nagtitikadugang pa an kaso ha mag-asawa nga Grey labina yana nga mag-ereleksyon nga utro na liwat nira gin-gagamit an ira private armed group agud tarhugon an mga botante ha kairayahan han San Jorge, Samar.

“Iginpaabot han mga parag-uma ha AOC-NPA an presensya han armado nga grupo han mga Grey nga nahikit-an nga nakasul-ot hin mga bangot (bonnet), nanunuktok hin dis-oras han gab-i ha mga kilalado nga tagsuporta han ira pangontra ha pulitika ngan nananarhug. Ini an pinakalab-as nga kaso han panalapas han mga Grey kahuman tala nga kumalma an mga kaso han panmatay ha San Jorge ha pagkapriso han ira duha nga anak nga nagseserbe nga lider han ira armado nga grupo,” segun ha AOC-NPA.

Segun pa han AOC-NPA, makusog an ebidensya nga ginsalawad ha husgado han katawhan nga diri la hi Jojo Grey an direkta nga nagplano ngan nagmando ha private armed group nga patayon hi Minda  Bisnar, kundi dako an papel dinhi han iya asawa nga hi Nancy. Hi Minda Bisnar nanay han hadto anay pangontra ha pulitika ni Mayor Jojo Grey nga hi Lester Bisnar. Kun mahihinumduman, ginpatay hi Minda Bisnar hadton Pebrero 19, 2017 ha bungto han San Jorge samtang tigawas ha singbahan.  Labot pa hini, pira nga membro han armado nga grupo han mga Grey an nagpahibaro ha NPA nga ha kadak-an han mando nga pagpapatay, pirme aada an presensya ngan basbas ni Nancy Grey.

Dugang pa, ginsusukna liwat han AOC-NPA an paggamit han pondo han bungto han San Jorge han mga Grey agud sustentuhan an ira armado nga grupo ngan parabungon an negosyuhay ha druga dinhi, nga dugang nga nagpahitaas ha tantos han kriminalidad ha bungto ngan nagpapakuri ha kamutangan han mga parag-uma dinhi.

Pira ha mga landaw nga kaso han panmatay ha San Jorge nga ginpaluyuhan ni Jojo Grey ngan gin-aalegar nga may kalabutan an iya asawa:

1. Pagpatay han magtalaamay nga Inofre ngan Inorio dela Cruz samtang nasamaran naman hi Mario dela Cruz ha Brgy. Puhagan, San Jorge, Samar hadton tuig 2003.

2. Pagpatay kan Janjan dela Cruz ngan Omar Original nga chief tanod ha Brgy. Puhagan, San Jorge, hadton 2003.

3. Brutal nga pagpatay han burod nga hi Imac dela Cruz nga asawa ni Balodoy dela Cruz hadton 2007 ha Brgy. Puhagan, San Jorge, Samar. Antes tiwasan, ginburubalbag anay hin dos por dos nga kahoy an burod nga hi dela Cruz.

4. Utok han pagpatay han kapitan ha Brgy. Mabuhay, San Jorge, hadton Pebrero 2016.

5. Utok ha pakyas nga pagpatay ha kapitan han Brgy. Rawis, San Jorge hadton Marso 2016.

6. Pag-ambus kan Lester Bisnar, iya kakontra komo meyor ha adlaw mismo han eleksyon hadton 2016. Hiya mismo an nakada ha panhitabo kabakyang an iya anak, bugto ngan an iya bayaw ha pag-ambus.

7. Pagin druglord ngan pagpalurab han iligal nga druga ha San Jorge ngan kasapit nga mga bungto nga nagigin hinungdan han paghitaas han ihap han mga kaso han kriminalidad.

8. Pagmentinar han private army nga gin-gagamit ha panarhug, panringgal ngan panmatay ha hin-o man nga molupyo nga nakontra ha iya pagpadalagan han bungto ngan mga iligal ngan kriminal nga aktibidad.

“Gin-aaghat han rebolusyunaryo nga husgado han katawhan hi Nancy Grey nga atubangon an mga kaso ngan igpahayag an iya gapil hiunong hini. Samtang diri pa hiya naatender ha pagbista, ginsasagdunan liwat hiya nga diri maghimo hin ano man nga aksyon nga magdudugang han kaso ha iya, sugad han butad nga panarhug ha mga parag-uma, pagpakaraut ha rebolusyunaryo nga kagiusan ngan panhulga ha ira mga kritiko ha bungto.” sering han AOC-NPA