Batukan ang militarisasyon kag pasistang krimen sang 79th IB AFP kag PNP!

Nagalala ang militarisasyon kag pasistang krimen batok sa mga mangunguma kag mamumugon sang North Negros sa padayon nga imposasyon sang Memorandum Order 32 ukon de facto Martial Law sang rehimeng US-Duterte.

Ang kabangis sang MO 32 sang reaksyunaryong estado kag makinaryas sini nga militar kag pulis, nagaserbi sa pagpaseguro nga magpabilin sa gahum ang mga dunot, reaksyunaryo kag masupog nga kontra-rebolusyonaryong politiko kag dinastiya subong sang mga Marañon kag dela Cruz nga ara diri sa North Negros.

Ang mga kaperdehan sang AFP sa patag sang inaway, ginabwelta sang mga pasista sa mga indi-armado ukon mga sibilyan nga mangunguma kag mamumugon. Desperado nga ginapatuman sang National Task Force to End the Communist Insurgency ni Duterte ang todo-gera sini kontra sa pumuluyo kag pilit nga pagpasurender pinaagi sa E-CLIP nga programa.

Ilabe na sa syudad sang Escalante, lapnagon ang operasyon sang PDT ukon “peace and development team” sang AFP 79th IB sa indi magnubo sa 10 barangay. Ginabalik-balikan sang AFP ang mga barangay sa Escalante nga karaan na nga nakaagi sang abuso sang mga PDT sadto pang 2017-2018. Sa Libertad, Malasibog kag iban pa nga barangay, ang mga sibilyan lakip ang mga persons with disability (PWD), ginasuspekan nga nagahupot sang armas sang NPA.

Amo man ang nahitabo sa Barangay Bug-ang sa Toboso, ginapanransak ang kabalayan sang mga lider-mangunguma, pilit nga ginpiktuyran, gina-psywar ukon ginapamahug ang pumuluyo nga ginapangitaan sang mga matag-as nga kalibre sang armas, kag pilit ginapaperma sa mga dokumento agud mahimong “legal” kuno ang ila pasistang operasyon. Sa barangay Codcod, Quezon, kag Nataban sa syudad sang San Carlos, may ara na mga PDT kag ginapatuman ang curfew agud makontrol ang hulag sang populasyon. Ang mga PDT amo ang nawong sang Martial Law sa kaumahan.

Damol-nawong nga ginabandera sang mga PDT sang AFP na magbulig kuno sila sa mga mangunguma sa proseso sa reporma sa duta pinaagi sa ila himo-himong organisasyon, bisan nahibaluan man sang pumuluyo na ang militar kag pulis amo ang pinakasupog nga daw “private army” sang mga agalon mayduta sa landgrabbing kag pagpamatay sa mga nagahimakas nga mangunguma. Pagkatapos ipamasaker ang mga mangunguma sa Sagay, nagasaad na sa gihapon ang mga agalon lakip na si Duterte mismo sang pagpatalang nga reporma sa duta.

Sa idalom sang MO 32, daw “torture chamber” ang mga detachment kag HQ sang pulis kag militar ilabe na sa syudad sang Sagay kon diin hepe ang masupog nga kontra-hublag nga si Antonio Benitez Jr. Kalakaran na ang pagpang-torture sa mga persona nga ila ilegal nga dinakpan kag ginapasurender.

Ang mga nahitabo nga pagpasurender sa mga sibilyan sa Don Salvador Benedicto, madasig nga ginapatuman sa mga syudad sang Victorias kag Cadiz kag banwa sang Manapla kag EB Magalona. Libuan ka pumuluyo ang ginapatalang kag ginapasurender sa plano sang provincial government kag ni Gov. Alfredo Marañon pinaagi sa E-CLIP nga programa nga alagyan sang dako nga korapsyon sa probinsya.

Gani ang mga pumuluyo nga ginapangpahug sang pagpang-aresto bisan walay warrant, dapat mangin aktibo kag organisado sa pagdepensa sa ila mga kinamatarung kag kahilwayan. Ang Roselyn Jean Pelle Command- NPA nagapanawagan sa pumuluyo diri sa North Negros, ilabe na sa mga biktima kag pamilya sini nga indi magkahadlok sa pagbulgar sa publiko sa mga abuso sang militar.

Ang RJPC-NPA padayon nga maglunsar sang mga aksyon agud masilotan ang mga pasista kag kriminal nga ido-ido sang rehimeng US-Duterte kag mga dunot nga lokal nga pulitiko kag agalon mayduta. Bukas ang RJPC sa pumuluyo nga gusto mag-upod sa Bagong Hangaway sang Banwa, ilabe na ang mga pigos nga pamatan-on, kababayen-an, mangunguma kag mamumugon. MAGHIMAKAS! INDI MAHADLOK!