Operasyong militar sa 15th IB gi-ambush sa MCC-NPA


Madaugon nga gi-ambush sa usa ka yunit sa Mt. Cansermon Command – New People’s Army (MCC-NPA) ang operasyong militar sa tropa sa 15th Infantry Battalion (IB) Philippine Army sa Sitio Basakan, Barangay Panciao, Manjuyod, Negros Oriental niadtong Setyembre 3, alas 2:40 sa hapon. Nakaangkon og usa ka patay ug upat ka samaron ang habig sa kaaway.

Kini tubag sa madugay na nga paglapas sa tawhanong katungod sa halos pito na ka bulan nga presensya sa militar sa gihisgotan nga mga lugar. Nag-antus ang lumulupyo sa bukirong bahin sa Manjuyod hilabi na sa Barangay Panciao, Lukay ug Lamugong ug sa pipila ka kasikbit nga barangay sa lungsod sa Mabinay partikular ang Barangay Luyang ug Bagtik.

Kadungan sa triad operations (combat operation, intelligence gathering ug civil-military operation) sa 15th IB ang kuyanap nga pagpangabuso batuk sa mga sibilyan: nalimitahan ang pagpangabuhi ug pagpanguma tungod gibantayan ang kada lihok sa mga lumulupyo, kuyanap ang pagpangawat sa kahayopan, pagpangsaka sa kabalayan, pag-okupar og mga istruktura duol sa mga komunidad sama sa Barrio Hall nga nagtanom og kahadlok sa mga sibilyan ug nag-impluwensya og bayolente nga hinimoan ilabina sa mga kabataan ug estudyante. Dugang pa ang pagpakuyanap og sugal sa lokalidad.

Nagpakita og desperasyon ang 15th IB tungod sa kapakyas niini nga pildihon ang NPA. Pugos nga gipatug-an ang mga sibilyan kabahin sa presensya sa NPA, gipasanginlan ang mga magtutudlo nga kuno mga tigsuporta sa NPA ug nanghulga ang mga elemento sa 15th IB nga kung adunay mahitabo sa nag-operasyon nga army ilahang bombahan ang erya sama sa gihimo nila sa Marawi City. Ang mas grabe pa, pugos nga gipapirma ang mga gidudahan nga nagsupurta sa NPA isip mga “surrenderee” para ipakita nga kuno dako ang accomplishment sa mga opisyal sa AFP ug aron ilang makuha ang reward money nga gipatong sa mga gituohan nga opisyal sa NPA gikan sa gatasan nga programa nga Enhanced Comprehensive Local Integration Program (E-CLIP).

Sa pagkatinuod, mas gipadaghan pa sa 303rd Brigade ang ilahang presensya sa bukirong bahin sa Manjuyod, Mabinay, Ayungon ug Bindoy para panalipdan ang interes sa mga dagkong minahan sa nasambit nga mga munisipalidad ug ang Ilog-Hilabangan River Basin Project nga magdala og kadaot sa halos 30 ka barangay nga langkob sa Negros Occidental ug Negros Oriental. Moresulta sa dislokasyon sa halos pila ka libo nga lumulupyo ang ipatuman nga river widening ug itukod nga mega dam. Dugay na kini nga plano ubos sa Negros First Agenda ni Gob. Alfredo Marañon sa Negros Occidental.

Ang sunod-sunod nga mga opensiba sa NPA hilabi na sa Central Negros gitawag nga “alarming” sa lokal nga panggamhanan. Isip reaksyon, gidugang ang bag-ong tukod nga 94th IB para proteksyonan ang mga multi-billion nga mga proyekto.

Ang tinuod nga sundalo sa katawhan nanalipod sa interes ug katungod sa lapad nga masang linupigan, gipaseguro ang kaayuhan sa pangabuhian sa katawhan ug dili ang interes sa langyaw nga kapitalista, nagpakuyanap og pangmasa nga kultura ug dili ang anti-sosyal nga mga aktibidad ug impluwensya. Labaw sa tanan, usa siya ka hinagiban sa katawhang Pilipino aron makalingkawas sa dugay na nga pagkaulipon sa imperyalistang US ug dalagkong komprador burgesya ug agalong yutaan. Mao kini ang tinuod nga sundalo sa kabus, mao kini ang NPA–ang tinuod nga sundalo sa katawhan.

Mas labaw pa nga pakusgon sa MCC-NPA ang mga taktikal nga opensiba para matagaan og hustisya ang mga biktima sa militarisasyon, paglapas sa tawhanong katungod, pagpamatay ug pagpanghalit sa US-Duterte nga rehimen ug sa iyahang mga bayarang sundalo nga mao ang AFP ug PNP.

Dapat militante nga atubangon ang militarista ug pasistang rehimen ni Duterte. Kinahanglang mag-amping ang mga masa ug progresibong personalidad sa state-sponsored killings ug maduotong batukan ang Martial Law bisan wala pa kini gideklara sa tibuok nasud. Patigbabawan ang kahadlok ug mahimong madaugon sa pagpalagpot sa rehimeng US-Duterte!

Juan Malaya
Tigpamaba
Mt. Cansermon Command
New People’s Army – Central Negros